ايه اللى حصل فى حياتى

 برود غريب من ناحيته ....... جايز علشان قعد فى مصر كتير ...... بس انا شايفه ان ده مش مبرر يقعد يقول الجواز غلطه و انه مش زى ما كان متخيل و ان احسن حاجه فى الجواز العيال ..........برود و تجاهل صريح ليا و لمشاعرى ......... ليه مش حاسسين زى بعض ليه احنا مش واحد .......زمان كنت بحس اننا واحد بس اكتشفت بعد كده انه احساس زائف .........انا كمان كنت متخيله الجواز استقلال تام بس اتضح ليا عكس ده تماما بس اكتشفت حاجات تانيه غير كده و غير العيال طبعا تخلينى مبسوطه ان عملت الخطوة دى بس كنت فاكره ان احساسنا ده واحد بس دلوقت عرفت ان ده مش صحيح ......بيقول "بحبك" بس دلوقت مش عارفه افرح لانه بيقولها و لا ازعل علشان عارفه انه بيكدب عليا ...مش هاقول انه بيكرهنى بس مش حاسه انه بيحبنى .........حاسه بحيره و قله حيله.. عايشه رومانسيتى جوة الافلام و احلام اليقظه و اغانى فيروز   

http://www.youtube.com/watch?v=E5mwle7AQFg

اوعى تتجوزى واحد مسافر

اخيرا رجعت الشغل بعد اجازة سنه ...هو كان موجود فيها 9 شهور كانت ايام حلوة مع ان احنا الاتنين مش شغاليين و الحاله كانت "هه" على الاخر بس احساسى بيه فى البيت كان جميل .... الغريب انه مش بيتحمل المسؤليه قد كده بس على رأى المثل ضل راجل و لا ضل حيطه احيانا كتير بحس انه عبء و انه احسن لو اتخلصت منه بس اول ما بحس انه هيسافر صدرى بيضيق و مش ببقى عارفه اخد نفسى .... هيصعب عليا العيال ان حد فيهم يسأل عنه او يدور عليه ...ساعات بقول لنفسى ان الجوازة دى كانت غلط من الاول و ان انا انضحك عليا و اتدبست ...و نصيحه اوعى تتجوزى واحد مسافر

إضراب

النهارده و انا جايه كان فى اضراب......... العمال او اى ان كان قافلين الطريق و مولعين كاوتش و قاعدين ...... شفت منهم ناس ماسكين خشب فيه مسامير لو اى حد كلمهم او حاجه ......... الغريب بقى ان كان فى وسطهم بنت .......... انا استغربت اوى المشكله ان كل ده على الناحيه التانيه من الطريق .تقولولى و هى دى مشكله ...اقول اه لان العربيات لما لقت الطريق مقفول بقت تيجى مخالف لدرجه انهم خدوا الطريق كله على الناحيه التانيه و احنا اللى ماشين صح مالناش مكان !!!!!!!!! .........و الناحيه اللى فيها اضراب ماشيه اسرع مننا ...فى وسط ده كله عربيات الشرطه موجوده فى وسط العربيات اللى واقفه عادى و معملوش اى حاجه .....اللى يفرح بقى انك تلاقى ناس نزلت من العربيات او من سكان المنطقه علشان ينظموا العمليه مجهود كبير و من غير مقابل و كمان فعال ربنا يحميهم..........الناس اللى عملوا الاضراب دول معملوش حسابهم ان فى ناس عندها امتحانات مش هنقول شغل ؟؟؟ معملوش حسابهم ان فى ناس كبيره متستحملش زنقه العربيه لمده طويله خصوصا ان الطريق طويل؟؟؟؟ ياريت نبطل نفكر فى نفسنا و بس

ذكريات

شىء غريب انه فى ناس فى مراحل معينه فى حياتنا بيأثر فينا خصوصا مرحله الطفوله ..........
فى واحده كانت ساكنه قصدنا زمان و بعدين عزلوا و بعدين احنا عزلنا ...... يعنى بقالى كتير مشفتهاش كنت انا و بنتها اصحاب ......دلوقتى و انا فى العربيه بعدى على بيتها القديم كل يوم ابص عليه يمكن تكون واقفه ........مش عارفه هعمل ايه لو شفتها بس مش عارفه ليه كل يوم ابص على البيت مع انها عمرها ماوقفت اصلا ببقى عايزه اعرف اخبرها ............ شىء غريب التأثير اللى سابته فيا مخلنى لسه محتفظه بشكلها و ذكرياتى معاها يمكن اكتر من بنتها

ليه؟؟؟؟

النهارده و انا فى المكروباص و جايه على هنا قعدت جنبى واحده معاها ابنها و لا ايه مش عارفه من اول ما قعدت حسيت انها رايحه تمارس مهنتها و هى الشحاته طبعا و فى ايدها كيس علشان تلم فيه الغله المحزن فى ده كله اليبى اللى معاها نام و هى كمان نامت و سايبه الشباك مفتوح جيت اصحيها علشان تقفل الشباك علشان البيبى ,مصحيتش او عملت نفسها نايمه مش عارفه خليت اللى قاعد قدامها هو اللى يقفل الشباك ....... المحزن اكتر و اللى يقطع القلب انها و هى نازله كان ضهر البيبى باين قلتلها ضهره مكشوف و مديت ايدى علشان انزل هدومه ......... لقيتها كلها مبلوله يعنى هى كانت سايبه الشباك مفتوح و هو مبلول و نايم و كمان هتخرج بيه من العربيه و هو مبلول ........... ده اكيد مش ابنها و هى اكيد مش ام ........... ليه؟؟؟؟ليه واحده ممكن تعمل كده فى نفسها ؟؟؟؟؟؟؟؟؟ ليه ممكن واحده ممكن تعمل كده فى ابنها ؟؟؟؟؟؟؟؟؟؟ ليه واحده ممكن تأجر ابنها ؟؟؟؟؟؟؟؟؟ هل الحاجه و ضيق ذات اليد ممكن يعملوا كده فى حد .......... كل اللى املكه هو انى ادعى و ادوعكوا انكم تدعوا معايا ان ربنا يخلص البيبى ده من اديهم !!

شىء غريب حصل كنت فى قمه السعاده مع انى مخلصه الكليه بقالى 6 سنين الا ان اللى حصل النهارده بيبرهن ان الزمن مابيأثرش فى احترامى لشخص معين.........
اللى حصل انى براقب على الطلبه فى امتحان صعب شويه ...... دكتوره الماده انا باحترمها جدا من ايام ما كنت طالبه ........ فرحت اوى لما شفتها و لما كلمتنى زى ما اكون لسه طالبه ........ شديت اللجنه و مخلتش حد يغش مع انى لما كنت بزعق لواحد كنت من جويا بترعش و ساعات شافايفى كمان ......... الصوت العالى طلع منين مش عارفه ......... الدكتوره بعد الامتحان قالت لى شكرا ........ يا سلاااااااااام كنت فرحانه كأنى رجعت 9 سنين ورا لما كنت طالبه فى مادتها مش قادره استنى لغايه اما احكى لاصحابى من ايام الكليه ان الدكتوره قالت لى شكرا.

يوميات

و انا جايه النهارده كان الطريق مقفول اهل بنت اتخطفت فهما شافوا ان احسن حل هو انهم يقفلوا الطريق خالص و يقفوا القطر كمان طبعا علشان انا اللى متعطله شايفه انهم مالهومش حق بس طبعا لو كنت مكانهم كان هيبقى ليا تفكير تانى!
جوزى تعبان مش عارفه اعمل ايه ...... عايشه حاله انكار بس هيجى عليا يوم و انفجر فى حد مش عارفه اتكلم مع مين فى الموضوع ده حاسه بوحده شديده ...........
مش عارفه ايه مشكله السواقين انه يركب معاهم سواق النهارده كان راكب سواق معانا بس سواق العربيه ماكانش طايقه

الطريق

الطريق للشغل بياخد وقت طويل اوى بقعد طول الوقت بفكر و اعيش احلام يقظه كتير .......
سلعلت بتخيل ان جوزى بيعرف واحده تانيه و اقعد افكر فى رد فعلى و ايه اللى ممكن اعمله ........ بحس بغضب شديد مع ان مفيش حاجه ......... او في انا معرفش احيانا كتيره بتتوه الامور جويا مش ببقى عارفه اذا كان حقيقه او تخيلات ممكن ابقى متضايقه منه على حاجه هو معملهاش و انا اللى متخيلاها ......... المفروص ان الواحده مننا متقعدش لوحدها كتير !!!!!
انا زعلانه من صاحبتى شيماء اوى علشان معدتش بتتصل بيا زى الاول و لا بتحكيلى على اى حاجه زى ما يكون فى حد دخل فى حايتها و اخد مكانى .

اخبار جديده

حصلت حاجه جديده فى حياتى اتمنى انها تقتل الملل اللى بدأ يتسرب ليها
اشتغلت......................:))
ايوه اتعينت ..... فى الحكومه .......!
مع لن اشتغلت وكالعاده فى شغلانه بقعد طول الوقت مبعملش حاجه تقريبا كل فين و فين لما يكون فى شغل
بس انا بحاول اشغل نفسى فى الشغل و الا هيتملكنى التفكير
جوزى لسه مسافر و مش هيجى قريب بحاول مفكرش فى الموضوع
الشغل بعيد اوى عن البيت بياخد تقريبا ساعتين لانى بودى ابنى الحضانه الصبح
مغامرات بتحصل كل يوم و كل يوم غير التانى علشان انيم الاتنين و اصحيهم الاتنين و البس و افطر و اودى الحضانه
زمان مكنتش البس نفس البس يومين ورا بعض بس دلوقت بقالى 10 ايام لابسه نفس البس
التغير اصبح رفاهيه لا املكها
نفسى اخصص وقت لنفسى فى البيت ........... بس ده كستحيل !

الخطأ

شىء غريب اوى اللى بيعمله الرجاله المسافرين.......... مبيفكروش فى حاجه مهمه جدا و ان هما بيعودوا الست انها تعيش لوحدها من غيره.
اكتر حاجه ممكن الست اللى جوزها مسافر تتعلمها هى انها تبقى مستقله وجوده مبيشكلش اى فرق فى حايتها لانه اصلا مش موجود معظم الوقت المشكله ان فى رجاله مش مسافرين و لا حاجه بس بيرتكبوا نفس الغلط مش متحمل اى مسؤليه خالص هتقولولى انهم بيصرفوا على البيت ... يعنى هى دى المشكله ان الواحده تبقى مستقله ماديا معظم الستات دلوقتى مستقلين ماديا ........ الخطأ الاكبر بقى اللى بيقعوا فيه انهم بيخنقوا الستات بتعهم يعنى "متخرجيش" "ما تشتريش دى" يعنى حاجات زى كده لا و ايه كمان يحملها مسؤليه كل حاجه وحشه بتحصل زى "الولاد دراجتهم وحشه ليه " "البيت مش نضيف ليه " " الهدوم مش مكويه ليه " يعنى لا منه و لا كافيه شره !!!!
انا حاسه انى مخنوقه و لوحدى و المسؤليه كلها عليا مش عارفه اتحرك و لاعارفه افضفض لحد .......... حاسه انى اتجننت طول الوقت بكلم فى نفسى و عايشه على طول فى احلام يقظه و فاقده التركيز نهائى و رد فعلى لاى حاجه بطىء جدا مش عارف الطريق اللى انا مشايه ده رايح على فين؟؟؟؟؟؟؟؟؟

الحقيقه المره

ولدت الحمد لله بنت صحيح كان نفسى فى ولد بس الحمد لله
ولدت قيصرى مع ان ولادتى الاولانيه كانت طبيعى ....... ولدت بعد معانه و امل انى اولد طبيعى
و انا فى المستشفى قلت لماما روحى دلوقت علشان تقعد مع ابنى الصغير و انا هاتصل بواحده صاحبتى تيجى تقعد معايا
اتصلت و قالت هتيجى و بعدين لما اتأخرت اتصلت بيها و قالتلى مش هقدر!!!!!!
قعدت افكر فى حد تانى و ملقتش ............. كنت دايما بـافتخر انى ليا اصحاب كتير بس للاسف اكتشفت الحقيفه المره انى ماليش اصحاب بجد
اصحاب اقدر اعتمد عليهم وللاسف اكتشفت الحقيقه دى فى اسوأ وقت .

العوده

ياه بقالى كتير مكتبتش و لا فرغت اللى جواى ........
حصل حاجات كتير من اخر مره كتبت فيها اهمها الثوره
ياه اللى حصل ده فعلا شىء جميل لازم كلنا نبقى فخورين بيه خصوصا بعد اللى حصل فى البحرين و اليمن و لبيا و سوريا ...........
الشباب اللى نزلوا يحمونا طول اليل من البلطجيه ......... كانوا نازلين و هما عارفين انهم ممكن يموتوا خصوصا فى منطقه زى اللى انا ساكنه فيها اصلا مفيهاش سكان كتير و البيوت بعيده عن بعضها و مع ذلك مفوتوش ليله ............. دول اكتر ناس اثروا فيا اوى لانى طبعا و نظرا لظروف حملى مقدرتش اشارك فى الميدان ......... حفظ الله الثوره من اعداءها
من الحاجات اللى حصلت تانى ان حمايا اتوفى
وفاته اثرت فى الكل لانه كان كبير البلد و مكانش عيان بيصحوه علشان يصلى الفجر مصحيش بالبساطه دى !!!!
وفاته طبعا اثرت فى جوزى جدا لانه كان بيحبه و مش متوقع .... محدش كان متوقع ........ جه؟ طبعا جه و قعد شويه و سافر تانى
عمرى ما تخيلت اد ايه وفاه شخص واحد ممكن تأثر فى تماسك عيله كبيره زى دى !!!!!!!!!!!
اللى ضايقنى انه محدش اتصل بيا يسألنى غبتى ليه ؟ فينك؟ اى حاجه ..... محدش .............
من الحاجات اللى حصلت ان بنت ابن خالى اتوفت
بنت صغيره عندها يجى خمس سنين كانوا رايحين يتفسحوا و اتقلبت بيهم العربيه و ماتت برضه بالبساطه دى
ربنا يرحمهم و يصبر اهلها
..............................................................
المفروض برضه انى على وش ولاده خلاص زهقت و نفسى افتح بطنى بسكينه و اطلعها بقى بس كل بأونه

الروتين المعتاد

لاحظت حاجه غريبه فى كل مره بتضايق فيها منه
طبعا لما اى حد يقول حاجه تضايقنى اكيد هزعل ...... خصوصا لو كان حد بحبه و هو بيحبنى ....... و لا ايه؟!
لما يجى يقولى حاجه تضايقنى فأزعل و هو يستغرب ازاى ازعل!!!!!!!!!!
المفروض انى بحبه و مزعلش منه ابدا !!!!!!!!!!
مع انه بيزعل منى كتير و على اتفه الاسباب ...............
اقوله انى انسانه و بحس و طبيعى انى اضايق لما حد يقولى كلمه تضايقنى ......... يستغرب
ولو سألنى انت زعلانه و قلت اه يعمل حاجه من اتنين ..
ياه يخلنى اكره نفسى علشان زعلت و انى كده مش بحبه و يقعد يلوم فيا و يحسسنى انى غلطانه
ياه يسبنى و يمشى او يسكت و يقولى براحتك
و انا اقوله هو ده اللى قدرت عليه ...... يقولى انا مبحبش اتحايل على حد !!!!!!!!!!!!!!!!
ساعات بحس انه بيتعمد يجرحنى المشكله دلوقت انى بريح دماغى و مبقولش انى زعلانه بسكت و اكتم فى قلبى و خلاص
.............................................................
نفسى احس انه بيحس بيا انا ما افتكرش مره انه حس بيا و انا زعلانه و مقلتش له بكون بعيط و انا جنبه و هو مش حاسس بيا
مره قالى انه ايام الجامعه كان فى واحده يعرفها كان بيحس بيها انها جت الجامعه من قبل ما يشوفها !!!!!!!!!!!!!!!!!!
.............................................................
نفسى احس انى زى بقيت الستات اتدلع و حد يتحايل عليا علشان ارضى
نفسى يصالحنى مره بطريقه كويسه مش انه يحسسنى انى غلطانه
انا عاده مش بوصله للمرحله دى لانى عارفه انه عمره ماهيتحايل عليا و كل اللى هيعمله انه هيسبنى و يمشى

the story of us

شفت فيلم the story of us
فيلم جميل جدا واقعلى جدا يا ريت كل الناس اللى مقبله على الجواز تشوفه علشان يعرفوا حقيقه اللى جاى و ميتصدموش
امبارح جت فرصه و خرجت بره البيت ....... انا قبل ما اتجوز مكنتش بحب اقعد فى البيت خالص .
قابلت صحاب قدام ليا مشفتهمش من زمان واحده منهم سابت بيت جوزها و قاعده عند مامتها قلت فى سرى الحمد لله الذى عفانا بس كان نفسى اسألها هى ايه المشكله ..... فضول مش اكتر المشكله انى بعد ما اعرف لازم هقول راى مش هقدر اسكت و ده اللى بيبوظ علاقت كتير ان الناس مش بتقدر تسكت

نص انا و نص هو

انا شفت حلقه واحده من مسلسل نص انا و نص هو فى رمضان
اول حلقه .... عجبتنى الفكره انه خلاص بعد ما اولادها كلهم اتجوزوا مبقاش فى سبب انها تقعد مع واحد هى شايفه انها مبطربتهوش اى علاقه بيها ...... او اى ذكريات كويسه
اوحش حاجه ان الواحد يحاول يفتكر ذكرى كويسه بالشخص اللى بيحبه و ميلاقيش
انا حاولت افتكر اى ذكرى كويسه ملاقتش
مش عارفه هو لو حاول هيلاقى و لا لا !
لازم اسأله
بس اا رأى ان اى اتنين مش بيحبوا بعض لازم يسيبوا بعض و ميقعدوش مع بعض علشان الاولاد لان ساعات الانفصال بيبقى اريح لهم على الاقل ميبقاش فى خلافات و نكد طول النهار فى البيت
انا اتمنى انى موصلش لحاله الست اللى فى المسلسل و لو انى فى ظل حاله الاكتئاب اللى انا فيها شايفه ان حياتنا ماشيه فى الاتجاه ده

الاكتئاب

مشكله الستات اللى كل الرجاله ميعرفوهاش اللى بترجع ليها تغير حالتهم المزاجيه بشكل عشوائى و كبير هو الاكتئاب
المشكله ان الاكتئاب ده مش سببه نفسى لا سببه عضوى بسبب تغير الهرمونات عند الستات
يعنى مثلا مره كل شهر و الحمل و اكتر حاجه اكتئاب ما بعد الولاده
المشكله ان الراجل لما بيشوف الست مكتئبه بيحاول ياخد موقف دفاعى و ده اسواء حاجه ممكن يعملها و ممكنياخد موقف اصلاحى يعنى يحاول يحل المشكله و ده طبعا بيزود الاكتئاب عند الست و كمان يخلى الراجل يحس بالعجز
اللى كتير من الرجاله متعرفهوش ان المرحله دى جايه جايه مهما حاول اى حد انه يمنعها
و الحل........
الحل بسيط انه الراجل لازم يعرف انه مش هو السبب مهما الست قالت انه هو السبب معظم الستات فى الوت ده بتقول كلام مش قصداه هى بتقوله و خلاص
و الاهم من كده ان الست محتاجه تعاطف و محتاجه حد يحتويها
انا اعتقد ان معظم المشاكل بين المتزوجين سببها اتخاذ الراجل موقف دفاعى و بعدين اكيد مش بيحل حلجه فيلاقى نفسه من غير تفكير بياخد موقف هجومى فيحصل حاجات و مواقف بتكون هى فعلا سبب فى زعل الستات و الرجاله بعد كده من بعض بيبقى السبب واضح و الاكتئاب مبيروحش بعد الاسباب العضويه ما تنتهى لان بيكون فى اسباب تانيه نفسيه.

المرة التانيه

غريب اوى الانسان............

اول مره حملت فيها كان زى ما كون شايله قنبله نوويه فى بطنى

حاسبى ............ خدى بالك من نفسك ............. متعمليش حاجه خليكى مستريحه انتى

كلى كويس ............. و لا النصايح كل واحده عامله نفسها دكتوره علشان حملت قبل كده مره

لا متكليش ده مش حلو ............. امشى شويه متقعديش كده ...........متشليش حاجه تقيله

كلى ده اصله حلو ............... و هكذا

اما تانى مره بقى

انتى هتفضلى قاعده كده ما تقومى تعمليلك حاجه ............... ماله الاكل ده ابقى اعملى لنفسك اى حاجه بقى

و اكتر واحده بيتغير تعاملها هى الحما فى الاول ماكنتش بتخلينى اعمل حاجه انما دلوقت تبقى شايفانى بعمل و عادى

ده مش ذم فيها بس الواحده فى اول مره بتبقى شايله ولى العهد اول ما يجى خلاص كده كل اللى يجى بعده مش مشكله

كمان الناس اللى حولايه اتطمنوا من المره الاولانيه ان حملى الحمد لله مش متعب حمل عادى زى اى حد !!

كلاكيت تانى مره

حامل لتانى مره!!!!!!

مكنتش مرتبلها ........ بيعيد عليا ذكريات مش عايزة افتكرها اولها الاحساس بالغثيان

و طبعا اختلاف المود الفظيع زى ما اكون مجنونه بالظبط

مش عارفه ليه الواحده بعد ما بتمر بكل القرف اللى فى الحمل من كل حاجخ فيه اول ما بتولد بتنسى كل ده و تبقى عايزة تحمل تانى

مره واحده قريبتنا قالت لى الحمل و الولاده دى العلقه المنسيه

عندك حق ياطنط

البدايه

كانت اول اجازه ليه بعد ما خلفت

او اى واحده عايزة تعرف الجواز على حقيقته بتعرفه اول ما تخلف اول عيل

الحياه بتختلف خالص..............

اولا مطلوب منك انك تعملى كل حاجه تطبخى و تغسلى و تنضفى و كل ده و هو مالوش دعوة بالنونو و او شاله شويه يبقى ده من فضله عليكى مش واجب عليه و لو كان فى ماتش ولا حاجه اتصرفى انت بقى و كمان ميعملش صوت !!!!!!!!!

ثانيا مينفعش تتعبى لان كل الحاجات اللى فاتت دى مش هتتم و هيضطر هو يعملها و ده مستحيل طبعا

ثالثا اصحى بدرى مع النونو لما يصحى و اهديه علشان هو ميصحاش و يفضل نايم على راحته و لما النونو ينام يصحى هو فخلاص مفيش نوم اجى باليل انا صاحيه بدرى وعايزه انام و تعبت طبعا من اللف طول النهار فى الشقه رد الفعل يكون غريب و اتهامات مؤلمه زى "هو انت على طول كده عايزة تنامى ","انت مش عايزة تقعدى معايا طيب انا جيت ليه ؟" مع العلم انى ساعات بكون صاحيه و النونو نايم و هو سايبنى و قاعد على النت بيقرا اخبار الرياضه

جه عليا وقت حسيت انه مش طايقنى و لا طايق النونو و لا طايق البيت خصوصا لما كنا فى البلد عند اهله على طول سايبنى و قاعد تحت ما يفرقش معاه ان كنت عايزة حاجه و لا لا و طبعا لو اشتكيت يقولى انت ممله و بتزهقنى فبضطر اسكت و متكلمش ................

العودة

قاعده بكتب فى البلوج بعد ما خلصت شغل ..... ايوة اشتغلت من البيت...........
بكتب بعد ما لمت شتات نفسى بعد سفره ...... سافر........معرفش ليه ساعات بنسى هو بيسافر ليه........
علينا من ده بأيه...........مع ان وجوده مش مريح ...........بس ساعات بحس انى زى القطط مبحبش الا خناقى
حصلت حاجات كتير حاجات غيرتنى من نحيته شويه و خلتنى اخد قرارات مش عارفه ان كانت فى صالحى و لا لا
و اذا كنت هاقدر التزم بيها و لا هضعف؟
هبقى احكى كل حاجه فى وقتها ........
ما انا لازم اتكلم و الا هيجرى ليا حاجه.