العودة

قاعده بكتب فى البلوج بعد ما خلصت شغل ..... ايوة اشتغلت من البيت...........
بكتب بعد ما لمت شتات نفسى بعد سفره ...... سافر........معرفش ليه ساعات بنسى هو بيسافر ليه........
علينا من ده بأيه...........مع ان وجوده مش مريح ...........بس ساعات بحس انى زى القطط مبحبش الا خناقى
حصلت حاجات كتير حاجات غيرتنى من نحيته شويه و خلتنى اخد قرارات مش عارفه ان كانت فى صالحى و لا لا
و اذا كنت هاقدر التزم بيها و لا هضعف؟
هبقى احكى كل حاجه فى وقتها ........
ما انا لازم اتكلم و الا هيجرى ليا حاجه.

المعادله الصعبه

انا اعتقد ان الواحده لو محستش بالامان فى علقاتها بزوجها او فى حياتها عموما عمرها ما هتحس بالسعاده
و فاقد الشىء لا يعطيه
يعنى الطرف التانى مش هيحس بالسعاده
و للاسف هيرمى مسؤليه عدم احساسه بالسعاده على الطرف الاول مع ان هو السبب
هى دى المعادله الصعبه
الستات ارضاءها سهل و بسيط بس اغلب الرجاله بيكسلوا او بيطنشوا او مش فارقه معاهم
و فى اللى مش عارف و ده احسن نوع لانه ممكن يعرف بس الخوف انه بعد ما يعرف يتحول لنوع من الاولانين
اللى بيخلينى اقول الكلام ده دلوقت انه كان بيحكيلى ويقولى ان مره اخوه قاله لا قعد كتير مش يكلمه
و حتى بعد ما اخوه ده قعد يتحايل عليه كتير مرضيش يكلمه
وقالى بعد كده انا محبش اقول لمراتى حاجه و تقولى لا
تفتكروا احس بأيه بعد كده ؟؟؟؟؟؟؟؟؟
انا حسيت انه ممكن يغدر بيا فى اى لحظه
انا حسيت انه مش بيحبينى مع انى متأكده انه بيحبينى !
انا حسيت انه بيتلكك او ما صدق ان حصلت مشكله و يريح دماغه
...................
انا عمرى ما كنت هافكر انى اقول له لا لانى عارفه انه موجود لكن دلوقت................
انا لازم افكر بطريقه مختلفه لانى عارفه انه ممكن يسيبنى

Imagining argentina

فيلم Imagining argentina
شفت امبارح الفيلم ده على قناه دبى وان صحيح ما شفتهوش من اوله لكنه فيلم رهيب
صادم و حزين ......
الفيلم بيتكلم عن مرحله احتلال النازيين للارجنتين
انا اول مره اعرف ان النازيين احتلوا الارجنتين
اللى كان فعلا صادم ازاى لشخصيه انتنيوبانداريس فى الفيلم بعد ما اتخطفت بنته و مراته و هو هادى جدا
و حتى مقدرش يقتل الجنرال الالمانى اللى كان ناوى يقتلوا
ليه بعد معرف ان ليه بنت مخطفهاش؟
معذبهاش ؟
مقتلهاش؟
انا كنت باكل فى نفسى بالنيابه عنه###
فيلم يستحق فعلا المشاهده

الهديه

عيد ميلاده فى شهر تسعه.......جبت الهديه من بدرى علشان ظروف الولاده مش هتخلينى اعرف اجيب فى وقتها
و فضلت محافظه عليها من البهدله لانه كان تيشرت ابيض ........و بعتها له !
صحيح هو معلقش على الهديه لما وصلت له انا قلت يمكن مش مقاسه و مش عايز يكسفنى
لسه دلوقت عرفت بالصدفه انه حتى ماقاسهوش و ملبسهوش علشان يشوفه على نفسه
يقولى اصله صيفى و هنا فى شتا !!!!!!!!
طيب كان يقيسه بس مش لازم يلبسه....
و اللى قدره عليه ربنا يقولهولى ما انت جايبالى تيشرت ابيض ما هو هيتبهدل فى الشغل!!!!!!!!!!!!!!!
....................................................
جاى قريب ..........الشهر اللى جاى و هيقعد لحد عيد ميلادى و بعدها كمان مش عارفه بقى اذا كان هيفتكره و لا .............
المره دى مفيش حجه الامور مستقره و يارب تفضل مستقره.

التعليق

Towtor يقول... U r great , u always do yr best , u r smart , active, sensitive , kind person.it's weired that i was saying the same " boring" about my self . i think most of women are boring ,because they don't let their emotions go out their hearts and minds.i don't know what u can do to make him feel satisfied about u . i'll just say "give him concentrated things , give him double of everything , sex, passion ,love.let him breath you whenever and wherever he goes" take care of every detail he cares about, food ,laundry ".don't ask , argue, investigate , just listen with nice smile .Make him no. 1,2,3,4,5,6,7,and 8 .put yr child as 9 , then put yr self , dreams , desires , family as no.10. don't forget that his family is his shadow , treat them as u wouuld love to treat him . don't care about what he gives others . just care about what u can give him
التعليق ده كان على البلوج اللى فات من اعز صديقاتى انا نشرته تانى علشان ده احسن تعليق اتقال ليا على المشاكل اللى انا فيها حسسنى لسه فيه فرصه لتصليح الوضع
شكرا ليكى يا شيماء

انا ممله

الولد نام مبقيتش اعرف ادخل كتير على النت منه واخد كل وقتى
بس مبقيتش قادره استحمل كنت محتاجه اكتب و افضفض شويه
خلاص جاى من السفر ......اخيرا كنت فرحانه اوى لما اخيرا اخد القرار انه جاى
كنت حاسه ان اليوم مش جاى ابدا
هو قالى لو قلتلى انزل هنزل بس ساعتها انا مش هبقى فرحانه
انا عايزاه ينزل علشان هو عايز كده مش انا عايزه كده
كل يوم تقريبا بكلمه......... ساعات يسألنى انت مش هتزهقى منى لما اجى
و انا اقوله لا طبعا
النهارده قلت له بس انت اللى هتزهق انت بعد ما اتجوزنا قلتلى مره انك زهقت و انى ممله
قالى فعلا انت ممله شويه !!!!!!!!!!!!!!!!!!!!!!!!!!!!!!!!!!
و لما قلتله يعنى هتزهق قالى ما انتى اللى بتسالى و انا برد
و من اسبوع تقريبا قالى ان الاهمال فى دمى !!!!!!!!!!!!!!!!!!!!!
...................................................
مش عارفه اعمل ايه اكتر من كده
مش عارفه اذا كان اللى بعمله كفايه و لا لا
بس مفيش واحده بتعمل زى
يبقى ايه المشكله
دايما بيشتكى منى
و لو اشتكيت منه ابقى نكديه وعايزه اتخانق
و لو سكت يبقى هو بيتكلم و انا مش برد يعنى مش عملاله اعتبار
انا تعبت ................ تعبت
هو انا حظى هيفضل كده على طول حاسه انى معزوله عن الناس ووحيده قبل و بعد الجواز
ولا انا ماليش نفس انى اسمع كلمه كويسه على حاجه عملتها

الفرح

فرح اخت جوزى!!!
و ايه يعنى فرح زى اى فرح بيحصل فى مشاكل و خنقات و شكاوى بس الاهم من كل ده بيحصل فيه صلح و مراضيه .
و زى ما بسمع ده بسمع ده ......
فجأه خطيبها جه مكنش معرف حد انه هيجى من السفر دلوقت
و ابتدت الحاجات الناقصه تكمل و الدعاوات تشتغل
حجز القاعه و الكوافير و الفستان
العروسه عايزه كل حاجه على مزاجها و العريس عايز يققل انفقات
و ام العريس مش بالعه العروسه و ابو العروسه فروه اتنحل
من ساعه ما العريس جه و هو كل شويه يجيب لها حاجه من اللى كان جايبها لما كان مسافر
و هى تيجى توريهالى و انا اضايق .........
ليه محصلش معايا كده ؟؟؟؟؟
هما يخرجوا يتفسحوا و يلفوا ..........
لكن انا لا ؟؟؟؟؟؟؟
عريسها طول النهار قاعد معاها يروح نص ساعه و يجى تانى
لكن انا لا ؟؟؟؟؟؟؟
محصلش معايا كده .
انا حتى هو سألنى قبل ما نتجوز انا "انا بحبك و لا لا؟"!!!!!!!!!!!!!!!
انا ساعتها اتصدمت من السؤال بس امتصيت الصدمه و مجبتش سيره الموضوع ده تانى ...
مش عارفه ليه افتكرت كل ده دلوقت جايزعلشان هو مسافر و مش معايا
و لا الاحسن انه كان مسافر علشان متحصلش مواجهه ؟
مبقتش عارفه امتى هتخلص من ذكرياتى السيئه دى
و سعات بقول لنفسى ما هو لو كان فى ذكريات كويسه كنت نسيت التانيين
و لا هى مجرد تخيلات و هتروح و خلاص ؟


كنت عصبيه اوى فى الفتره اللى فاتت كل ما حد يشوفنى يقولى هو مجاش ليه و هيجى امتى
و انا اعرف منين
و اعرف منين هو منزلش ليه
و اخته تقولى انا قلتله ينزل علشانكوا
قلتلها لو كنت عايزاه ينزل مكنتيش تجيبى سيرتنا
مش عارفه ليه قلتلها كده و ياترى هى دى الحقيقه و لا لا
الفرح خلاص خلص و كله روح عاى بيته و خلاص